🐓 🐓 🐓 കുക്കുടപുരാണം; അഥവാ “കോഴിക്കഥ” 🐓🐓🐓

യോജിച്ച കഥാബീജം ആണെങ്കിലും ഇതില്‍ ആത്മകഥാംശം അശേഷം ഇല്ല എന്ന് ആദ്യമേ ഉറപ്പ് തരുന്നു. ലോകത്തിലെ അനേകം പക്ഷികളും ജീവികളും അക്ഷരലോകത്ത് വാഴ്ത്തപ്പെടുകയും അവയുടെ ചരിത്രങ്ങള്‍ എഴുതപ്പെട്ട രേഖകള്‍ ആകുകയും ചെയ്യുമ്പോള്‍ കാണാന്‍ അത്ര മോഞ്ചില്ലാത്തത് കൊണ്ടാവും,  കോഴികള്‍ അവഗണിക്കപ്പെടുന്നത് കണ്ടുള്ള തീവ്രദുഖത്തില്‍ നിന്നുണ്ടായ സ്വാഭാവിക പ്രതിഷേധം അറിയിക്കുക, തങ്ക ലിപികള്‍ കിട്ടിയില്ലെങ്കില്‍ വേണ്ട മിനിമം ഒരു അലുമിനിയം ലിപിയില്‍ എങ്കിലും കോഴിചരിതത്തിന് ഊന്നല്‍ കൊടുക്കുക എന്നിവയാണ് പ്രചോദനം.

 

കോഴി എന്ന് കേള്‍ക്കുമ്പോള്‍ സ്വാഭാവിക പുച്ഛം ആയിരുക്കും മനസ്സില്‍? ജാതിവ്യവസ്ഥയുടെ പ്രശനം. വൃത്തിയും വെടിപ്പും അത്ര ഇല്ലാത്ത ശരീരവുമായി വീടിനു ചുറ്റും അലഞ്ഞു തിരിഞ്ഞു നടക്കുന്ന ടച്ചിങ്ങ്സ് ആണ് പലര്‍ക്കും കോഴി. എന്നാൽ അനേക വര്‍ഷങ്ങളുടെ പാരമ്പര്യവും മഹിമയും ചരിത്രവും പറയാനുണ്ട് ഓരോ  കോഴികള്‍ക്കും. കൊഴിഞ്ഞുപോയ സംസ്കാരങ്ങളെയും തലമുറകളെയും രാജ്യങ്ങളെയും ഗോത്രങ്ങളെയും എല്ലാം സ്വാധീനിച്ചുകൊണ്ട് കോഴികള്‍ ഇന്നുവരെ നടത്തിയ ജൈത്രയാത്ര സങ്കൽപ്പിക്കാവുന്നതിലും വളരെ ആകർഷകമാണ്. നാണം കുണുങ്ങിയായ കാട്ടുകോഴികളില്‍ നിന്ന് 570 ഓളം ഇനങ്ങള്‍ ആയി എണ്ണിയാല്‍ ഒടുങ്ങാത്ത രുചികള്‍ ആയി ഇവ നമ്മുടെ നമ്മുടെ മുന്‍പില്‍ എത്തിയത് എങ്ങിനെയെന്ന് എപ്പോഴെങ്കിലും ചിന്തിച്ചിട്ടുണ്ടോ? അനേക ചോരച്ചാലുകള്‍ നീന്തിക്കയറി...ഉവ്വ.. അങ്ങനെ തന്നെ.

 

ഏകദേശം അഞ്ച് കോടി വര്‍ഷം മുന്‍പ് തെക്കുകിഴക്കൻ ഏഷ്യയിലെ ഇടതൂർന്ന വനങ്ങളിൽ ഉണ്ടായിരുന്ന wild jungle fowl (ഒരിനംകാട്ടുകോഴി) ആയിരിക്കണം ആധുനിക കോഴികളുടെ (Gallus Gallus Domesticus)  മുതുമുത്തച്ചന്‍. അതില്‍ മുട്ടയാണോ കോഴി ആണോ ആദ്യം ഉണ്ടായത് എന്ന ചോദ്യം പ്രസക്തമല്ല. (അണ്ഡം എന്ന  നിലയ്ക്ക് മുട്ടആണ് ആദ്യം ഉണ്ടായത് എന്നാണ് ആധുനിക ബയോളജിസ്റ്റുകള്‍ കരുതുന്നത്. അണ്ഡം തന്നെയാണ് മുട്ട. അണ്ഡം തന്നെ സ്ത്രീയും) മനുഷ്യന്‍ കോഴികളെ വളർത്തിയെടുത്തുതുടങ്ങിയിട്ട്  ഏകദേശം 8,000 വർഷങ്ങൾ ആയി എന്ന് ശാസ്ത്രജ്ഞർ കണക്കുകൂട്ടുന്നു..

 

എന്നാല്‍ നാം കരുതുന്നത് പോലെ ആദ്യകാലങ്ങളില്‍ കോഴികളെ വളര്‍ത്തിയിരുന്നത് ഭക്ഷണമാക്കാന്‍ ആയിരുന്നില്ല. ആധുനിക ഭരണ സംവിധാനങ്ങള്‍ എല്ലാം ഉരുത്തിരുഞ്ഞു വരുന്നതിനും എത്രയോ മുന്‍പുള്ള കാലത്ത് ധീരതയുടെയും യുദ്ധത്തിന്‍റെയും വീര്യത്തിന്‍റെയും പ്രകടനമായി, കക്ഷികള്‍ തമ്മില്‍ ഉള്ള കലഹങ്ങള്‍ക്ക് പരിഹാരം ആയി, വിനോദം ആയി എല്ലാം വ്യാപകമായി ഉണ്ടായിരുന്ന “കോഴിപ്പോരിന്” ആണ് കോഴികളെ ഉപയോഗിച്ചിരുന്നത്. തിന്നാന്‍ അല്ലേയല്ല. കോഴിപ്പോരില്‍ ചത്തകോഴിയെ ഒരുപക്ഷെ തിന്നിരിക്കാം നമുക്ക് അറിയില്ല. മേല്പറഞ്ഞ സാഹചര്യങ്ങള്‍ കൂടാതെ, ഭാവി പ്രവചിക്കുവാന്‍ കാലാവസ്ഥ പ്രവചിക്കുവാന്‍ ദൈവങ്ങളെ സ്വാധീനിക്കാന്‍ ഒക്കെ കോഴിപ്പോരുകള്‍ വ്യാപകമായി നടത്തിയിരുന്നതിന്‍റെ തെളിവുകള്‍ പുരാതന ഇന്ത്യന്‍ വാമൊഴി വരമൊഴി വിവരണങ്ങളിലും റോം മുതല്‍ ഗ്രീസ് വരെയുള്ള അനേകം ചരിത്രങ്ങളിലും ധാരാളമായി ഉണ്ട്.

 

കോഴി ഇറച്ചി വ്യാപകമായി ഉപയോഗിച്ചതിന്‍റെ ചരിത്രം ആരംഭിക്കുന്നത് പുരാതന ഗ്രീസില്‍ നിന്നുമാണ്. നീച ജാതിയില്‍ പെട്ടവരും സമൂഹത്തിലെ ഏറ്റവും താഴെക്കിടയിലെ ആളുകളും മാത്രമാണ് അന്ന് കോഴി ഇറച്ചി കഴിച്ചിരുന്നത്. ആ കാലഘട്ടത്തില്‍ പന്നി ആയിരുന്നു തീന്‍മേശകള്‍ അലങ്കരിച്ചിരുന്ന പ്രധാന നോണ്‍ വെജ് വിഭവം. കടുത്തകുറ്റവാളികള്‍ക്കും, അടിമകള്‍ക്കും, മറ്റ് ദൌര്‍ഭാഗ്യവാന്‍മാര്‍ക്കും ശിക്ഷയായി കോഴിയിറച്ചി നല്‍കിയിരുന്നു. അഞ്ചാം നൂറ്റാണ്ടില്‍ ഗ്രീക്ക് ഭരിച്ചിരുന്ന ക്രൂരനായ സ്വേച്ഛാധിപതി സിറക്യൂസിലെ ഡയോനിസ്യസ്ന്‍റെ കഥ തന്നെ ഉദാഹരണം. മികച്ച സാഹിത്യകാരനും കവിയുമായി സ്വയം നടിച്ചിരുന്ന ഡയോനിസ്യസ് തന്നെക്കുറിച്ച് കവിതകള്‍ എഴുതാനും, അവ കൊട്ടാരസദസ്സില്‍ ഉറക്കെ ചൊല്ലാനും, അത് കേട്ട് തന്നെ വാനോളം പുകഴ്ത്താനും, പറയുന്ന തമാശകള്‍ക്ക് ഉറക്കെ ചിരിക്കാനും, കയ്യടിക്കുവാനും ഒക്കെയായി അനേകം പ്രഗത്ഭരായ കവികളെയും ചരിത്രകാരന്മാരെയും കൊട്ടാരത്തില്‍ നിയോഗിച്ചിരുന്നു. പ്രശസ്ത ഗ്രീക്ക് ചരിത്രകാരന്‍ ഫിലിസ്റ്റസ്, ഗ്രീക്ക് കവി ഫിലോസെന്‍സ്, സാക്ഷാല്‍ പ്ലേറ്റോ എന്നിവരൊക്കെ ഡയോനിസ്യസ്ന്‍റെ  കൊട്ടാരത്തിലെ കവികളും ആസ്ഥാന സാഹിത്യ സദസ്സിലെ അംഗങ്ങളും ആയിരുന്നു.

കൊട്ടാരത്തില്‍ നടന്ന ഒരു സംഭവത്തെക്കുറിച്ച് ഡിഡോറസ്സ് എന്ന ഗ്രീക്ക് ചരിത്രകാരന്‍ തന്‍റെ “ബിബ്ലിയോതെക്ക ഹിസ്റ്റോറിക്ക” എന്ന പുസ്തകത്തില്‍ വിവരിക്കുന്നുണ്ട്. സംഭവം ഇങ്ങനെയാണ്; താന്‍ എഴുതിയ ഒരു കവിതയെപ്പറ്റി മോശം അഭിപ്രായം പറഞ്ഞതിന് ശിക്ഷയായി ഫിലോസെന്‍സ് എന്ന മികച്ച കവിയെ ഡയോനിസ്യസ് രാജാവ് കരിങ്കല്‍ ക്വോറിയിലേക്ക് അടിമയായി കഠിനജോലിക്ക് പറഞ്ഞയച്ചു. പിന്നീട് കരിങ്കല്‍ ക്വോറിയിലെ കഠിന ജീവിതം ഫിലോസെന്‍സിനെ നല്ല മനുഷ്യന്‍ ആക്കി മാറ്റിയിരിക്കും എന്ന പ്ലേറ്റോയുടെയും മറ്റ് ആളുകളുടെയും അപേക്ഷ ചെവിക്കൊണ്ട രാജാവ് രണ്ടുവര്‍ഷം കഴിഞ്ഞപ്പോള്‍ ശിക്ഷ ഇളവ് ചെയ്ത് ഫിലോസെന്‍സിനെ കൊട്ടാരത്തിലേക്ക് തിരികെ വിളിപ്പിച്ചു. അതിനുശേഷം അന്യരാജ്യത്തുനിന്നും മറ്റും അനേകം പ്രധാനവ്യക്തികള്‍ പങ്കെടുത്ത ഒരു രാജസദസ്സില്‍ വച്ച് രാജാവ് താന്‍ എഴുതിയ കവിത ഉറക്കെ വായിക്കുകയും എല്ലാവരുടെയും മുക്തകണ്ഠം പ്രശംസയ്ക്ക് പാത്രമാകുകയും ചെയ്തു. പ്രശംസയില്‍ മുങ്ങി നില്‍കുന്ന രാജാവ് അപ്പോഴാണ് മൂലയില്‍ നിശബ്ദനായി നില്‍കുന്ന ഫിലോസെന്‍സ്നെ ശ്രദ്ധിച്ചത്. “എങ്ങനെയുണ്ട് നമ്മുടെ പള്ളികവിത?” എന്ന ചോദ്യത്തിന് വിനീത വിധേയനായി താണ് വണങ്ങി ഫിലോസെന്‍സ് മറുപടി പറഞ്ഞു “യുവര്‍ ഓണര്‍, ദയവായി അടിയനെ കരിങ്കല്‍ ക്വാറിയിലേക്ക് തിരികെ അയക്കാന്‍ ഉത്തരവിടണം.”

ഈ പരസ്യ അപമാനത്തില്‍ കോപാകുലനായ രാജാവ് ഫിലോസെന്‍സിന്. വധശിക്ഷ വിധിച്ചു! അതും മരിക്കുന്നത് വരെ നിര്‍ത്താതെ കോഴിയിറച്ചി തീറ്റിച്ചു കൊല്ലുക! (ഇത്തരം ശിക്ഷാ രീതികള്‍ ഇപ്പോഴും അരുണാചലിലും പരിസര പ്രദേശങ്ങളിലും ഉള്ള ഗോത്ര വിഭാഗങ്ങളില്‍ നിലവിലുണ്ട് എന്ന് കേട്ടിട്ടുണ്ട്.)

 

തിരികെ കോഴിയിലേക്ക് വരാം, സങ്കീർണ്ണമായ  സാമൂഹിക ജീവിതമുള്ള പക്ഷികളാണ് കോഴികള്‍. അല്‍പ്പ സ്വല്‍പ്പം ബുദ്ധിശക്തിയും ഉണ്ട്. മുഖങ്ങൾ, ശബ്ദങ്ങൾ, സുഗന്ധങ്ങൾ എന്നിവയിലൂടെ പരസ്പരം തിരിച്ചറിയാൻ ഇവയ്ക്ക് കഴിയും. കോഴികൾ തമ്മിലുള്ള ആശയവിനിമയത്തിൽ 30-ലധികം വ്യത്യസ്ത ശബ്ദങ്ങൾ ഉൾപ്പെടുന്ന ഭാഷ സംവിധാനവും ഇവയ്ക്കുണ്ട്, ഓരോന്നിനും ഒരു പ്രത്യേക അർത്ഥവുമുണ്ട്. കാര്യങ്ങള്‍ പഠിക്കാനും, അനുഭവങ്ങളിൽ നിന്നും പഠിക്കാനും (trial and error) ഇവറ്റകള്‍ക്ക് കഴിയും. എന്നുകരുതി കണക്ക് കൂട്ടാനോ ഒന്ന് മുതല്‍ പത്തുവരെ എഴുതാനോ പൂജ്യം വെട്ടികളിക്കാനോ ഒന്നും അവയ്ക്ക് കഴിയില്ല. കൂട്ടത്തില്‍ ആരാണ് ആദ്യം ഭക്ഷണം കഴിക്കുന്നത്, ആരാണ് ആദ്യം ഇണചേരേണ്ടത്, ആരാണ് ബോസ്, എന്താണ് ചെയ്യാൻ പോകുന്നത്, എന്നൊക്കെ നിർണ്ണയിക്കാൻ ഉള്ള അവകാശം കൂട്ടത്തിലെ കോഴിമൂപ്പന് ആയിരിക്കും. കൂട്ടത്തിനുള്ളില്‍ തന്നെ പല സൗഹൃദങ്ങളും കൂട്ടുകെട്ടുകളും ഉണ്ടാക്കുന്നതിലും,  ചില അവസരങ്ങളില്‍ പക വച്ച് പുലര്‍ത്തി പ്രതികാരം ചെയ്യുന്നതിലും കോഴികള്‍ മിടുക്കരാണ്.(കൊത്ത് കിട്ടിയ അനുഭവം ഓര്‍ത്തു നോക്കൂ.)

 

രുചിയെ മാത്രമല്ല സംസ്കാരങ്ങളെയും കോഴികള്‍ സ്വാധീനിച്ചിട്ടുണ്ട്. സാഹിത്യം,ഭാഷ, കല, ശാസ്ത്രം, മതം എന്നിവയിൽ അവ തങ്ങളുടെതായ മുദ്ര പതിപ്പിച്ചിട്ടുണ്ട്. സൊറോസ്ട്രിയനിസം മുതൽ ബുദ്ധമതം വരെ വിവിധ സംസ്കാരങ്ങള്‍ കോഴികളെ വിശുദ്ധ ജീവികളായും, ഫലഭൂയിഷ്ഠത, ധൈര്യം, ജ്ഞാനം, നീതി എന്നിവയുടെ പ്രതീകങ്ങളായും ബഹുമാനിക്കുന്നു. വഴിപാടുകൾ, പൂജകള്‍ ഭാവിപ്രവചനം ദേവപ്രീതി എന്നിങ്ങനെ മതപരമായ ആചാരങ്ങളിൽ അവയുടെ പങ്ക് പലതും നമുക്കറിയാം. കൂടാതെ ജനിതകശാസ്ത്രത്തിലും ഭ്രൂണശാസ്ത്രത്തിലും മറ്റും കോഴികളെ അനേക പഠനങ്ങള്‍ക്ക് വിധേയമാക്കിയിട്ടുണ്ട്. ചാൾസ് ഡാർവിന്‍ തന്‍റെ സിദ്ധാന്തത്തെ ഊട്ടിഉറപ്പിക്കാന്‍ കോഴികളെ വിശദമായി പഠിച്ചിട്ടുണ്ട്. ഒരുകാലത്ത് ഭൂമിഭരിച്ച മുതുമുത്തച്ഛന്‍ T-Rex ന്‍റെ പാരമ്പര്യം ഉള്ള കോഴികള്‍ അത്ര മോശക്കാരല്ല എന്ന് സാരം.

 

എല്ലാ ഭാഷകളിലും കോഴികളുമായി ബന്ധപ്പെട്ട വാക്കുകളും പ്രയോഗങ്ങളും ഉണ്ടെങ്കിലും ഇംഗ്ലീഷ് ഭാഷക്ക് കോഴികള്‍ നല്‍കിയ കനത്ത സംഭാവന ചെറുതായി സൂചിപ്പിച്ചുകൊണ്ട് കുറിപ്പ് അവസാനിപ്പിക്കാം. കോഴികളുടെ നോട്ടവും,നടപ്പും, രൂപവും, ഭാവവും, സ്വഭാവവും, മുട്ടയും , ഇറച്ചിയും എന്തിന് കോഴികാഷ്ട്ടം വരെ അനേക പ്രയോഗങ്ങള്‍ ആയി ഇംഗ്ലീഷില്‍ ഉണ്ട്. സൊറോസ്ട്രിയന്‍ വിശ്വാസികള്‍ കോഴിയെ ഏറെ ബഹുമാനത്തോടെ കാണുന്ന ആളുകളാണ്; പ്രഭാതം പൊട്ടിവിടരാന്‍ കാരണം കോഴികള്‍ ആണല്ലോ. അങ്ങനെ പ്രകാശം കൊണ്ടുവരുന്ന ജീവികള്‍ ആയതുകൊണ്ടാണ് ഒരു പുതിയ തുടക്കത്തെ സൂചിപ്പിക്കാന്‍ കോഴി കൂവുന്ന ശബ്ദത്തില്‍ നിന്ന് “cock-a-doodle-do”  എന്ന പ്രയോഗം നിലവില്‍ വന്നത്.

 

പെടിത്തോണ്ടന്‍/ണ്ടി ആയ ആളെ “chicken shit”  എന്നാണ് വിളിക്കാറ്. “അട്ടയെപിടിച്ചു മെത്തയില്‍ കിടത്തിയാല്‍” എന്ന പ്രയോഗത്തിന് തുല്യമായി ഇംഗ്ലീഷില്‍ “You can’t make chicken salad out of chicken shit” എന്ന് പറയാറുണ്ട്. ഞാന്‍ അത്ര പൊട്ടന്‍ അല്ല എന്ന് പറയാന്‍ “I know the difference between chicken salad and chicken shit.”എന്ന് ദേഷ്യത്തില്‍ അങ്ങ് പറയുക, ആരും ആദ്യം ഒന്ന് പേടിക്കും. എന്നാല്‍ ഇത്തരം പ്രയോഗങ്ങള്‍ക്കൊന്നും അത്ര എളുപ്പത്തില്‍ കീഴടക്കാന്‍ കഴിയാത്ത മനക്കട്ടി ഉള്ള, അനുഭവപാരമ്പര്യമുള്ള ഇമോഷനുകളില്‍ ഒന്നും എളുപ്പം വീഴാത്ത ആളുകളെ “a hard-boiled ”എന്ന് പറയാം. മഞ്ഞയും വെള്ളയും വേറെ വേറെ ഉള്ള പുഴുങ്ങിയ മുട്ട സ്ട്രോങ്ങ്‌ ആണല്ലോ.

 

 

മോശം കയ്യക്ഷരത്തെ സൂചിപ്പിക്കാന്‍ “Chicken Scratch” എന്നാണ് പറയാറ്. സ്കൂള്‍വിടുമ്പോഴും ഓഫീസില്‍ നിന്നും മറ്റും പുറത്തിറങ്ങുന്ന ആളുകള്‍ കൂട്ടം കൂടി ഓടി ചാടി ഇറങ്ങിപോകുന്നത് കാണുമ്പോള്‍ കോഴിക്കൂട് തുറന്നുവിട്ടത് പോലെ എന്ന് തോന്നാറില്ലേ? അങ്ങനെ ഒരു പ്രയോഗം തന്നെ ഉണ്ട് ഇംഗ്ലീഷില്‍ “Fly the Coop”. (Coop കോഴിക്കൂട് തന്നെ)ആരും അറിയാതെ വീടിനുപുറത്ത് ഇറങ്ങുന്നതിനും ഇങ്ങനെ പറയാറുണ്ട്. ശരിയാണ്, ചിലകോഴികള്‍ അങ്ങനെയും ചെയ്യാറുണ്ട്. പക്ഷെ എല്ലാവരെയും അങ്ങനെ തുറന്നു വിട്ട് അഴിഞ്ഞാടാന്‍ ചിലര്‍ സമ്മതിക്കാറില്ല. അമ്മകോഴി കോഴികുഞ്ഞിനെ എന്നപോലെ എന്ന പ്രയോഗവും അങ്ങനെ വന്നതാകാം വളരെ അധികം സംരക്ഷണ ബോധം നിയന്ത്രണം ഒക്കെ കാണിക്കുന്ന ആളുകളെ "hen-mother" എന്നുവിളിക്കാം. നിങ്ങള്‍ക്കറിയാമോ കോഴിയുടെ തല മുറിച്ചു കളഞ്ഞാലും അത് തലങ്ങും വിലങ്ങും ഓടും എന്നത് ഒരു വിശ്വാസം മാത്രമാണ്. പക്ഷെ ചില പൊതുപരിപാടികളില്‍ ഒക്കെ ചില ആളുകളെ കാണാം ഒരു നിയന്ത്രണവും ഇല്ലാതെ ആളെ കാണിക്കാന്‍ പ്രത്യേക ലക്ഷ്യം ഒന്നും ഇല്ലാതെ തലങ്ങും വിലങ്ങും നടക്കുന്ന ആളുകളെ അതിനെ വിശേഷിപ്പിക്കുന്നത് “To Run Like A Chicken With Its Head Cut Off” എന്നാണ്.

 

ഉത്സവത്തിന് പോകാന്‍ ചിലവിന് 10 രൂപ കൊടുത്തിട്ട്; “പണം ഉണ്ടെന്ന് കരുതി ധൂര്‍ത്തടിച്ചു കളയരുത്” എന്നു മകനെ ഉപദേശിച്ച അമ്മാവനെ ഓര്‍മവരുന്നു, ബീഡിവലിക്കാന്‍ പോലും തികയാത്ത തുകയെ “Chicken Feed”എന്ന് പറയാം. ദുരുദ്ദേശത്തോടെ കൂടെ/ഒരു ഗൂപ്പില്‍ നില്‍കുന്ന ആളെ “Fox In The Henhouse” എന്നല്ലാതെ എന്ത് വിളിക്കണം! വേറെ ചിലരുണ്ട്, എന്ത് കേട്ടാലും അപ്പോള്‍ കരയും, ലോലഹൃദയര്‍ ആണവര്‍. അത്തരക്കാര്‍ “Chicken-Hearted” ആണ് പോലും. “ഇരുന്നിട്ട് കാലുനീട്ടണം” “ദിവാസ്വപ്നം കാണരുത്” എന്നതിനൊക്കെ തുല്യമായി ഉള്ളപ്രയോഗമാണ് “don’t Count Your Chickens Before They Hatch.” സ്ത്രീകള്‍ മാത്രമുള്ള പരിപാടികളെ  “Hen Party” എന്നാണ് വിളിക്കാറുള്ളത്. കോഴികള്‍ എപ്പോഴും കൊല്ലപ്പെടാന്‍ സാധ്യതഉള്ളത് കൊണ്ടാവാം “നാം എപ്പോഴും ചെറുപ്പം ആയിരിക്കില്ല” എന്ന പ്രയോഗത്തിന് തുല്യമായി “we shall not Be Spring Chicken always” എന്ന് പറയുന്നത്.

 

വിവാഹപാര്‍ട്ടികളില്‍ ഭക്ഷണം മോശം ആയാല്‍ അതിനെ ധൈര്യമായി “Rubber Chicken food” എന്ന് പറഞ്ഞോ. വധൂവരന്‍- വീട്ടുകാര്‍ക്ക് മനസിലാകാത്ത കാലത്തോളം  “അത്യുഗ്രന്‍” എന്നാണ് പറഞ്ഞത് എന്ന് അവര്‍ കരുതിക്കോളും. അതിരാവിലെ എഴുന്നേല്‍ക്കുന്ന ശീലം ഉണ്ടെങ്കില്‍  “I usually Wake Up With The Chickens” എന്ന് പറയാം. പക്ഷെ ഇത് നേരെ മലയാളത്തിലേക്ക് മൊഴിമാറ്റി പറയാതിരിക്കുന്നതാണ് അവനവന് നല്ലത്.

 

കോഴികളുടെ കൂട്ടത്തില്‍ സ്വാഭാവികമായി ഒരു പൂവന്‍ നേതാവായി അംഗീകരിക്കപ്പെടും അങ്ങനെ ഏതൊരു കൂട്ടായ്മയിലും സ്വാഭാവികമായി ഉണ്ടായി വരുന്ന നേതാക്കന്മാരുടെ നിരയെ “Pecking order” എന്ന് പറയാം.ഭാര്യാ/ഭര്‍ത്താക്കന്‍ മാരുടെ കടുത്ത നിയന്ത്രണത്തില്‍ കഴിയുന്ന ഇണകളെ “Hen-pecked” എന്ന് പറയുന്നത് മറ്റ് കോഴികളുമായി അടുത്ത ബന്ധമുള്ളത് കൊണ്ടാവും. എന്തിനും സമാധാനത്തോടെ പരിഹാരം ഉണ്ടാക്കാന്‍ ശ്രമിക്കാതെ തല്ലിതീര്‍ക്കാന്‍ ശ്രമിക്കുന്നതിനെ “Rooster games” (കോഴിപ്പോര്) എന്ന് പറയും. മുട്ടയിടാന്‍ കോഴികള്‍ കൂട് ഒരുക്കുന്നത്പോലെ. “ആപത്തുകാലത്ത് ഇംഗ്ലീഷില്‍ തൈപത്തുവെക്കാന്‍ പ്ലാന്‍ ഉണ്ടെങ്കില്‍...” അതിനെ “Feather your nest” എന്ന് പറയാം.

 

ചില സദസ്സില്‍ സദസ്യരുടെയും സ്ത്രീകളുടെയും ശ്രദ്ധാകേന്ത്രമാകാന്‍ എല്ലാം നിയന്ത്രിച്ചു നടക്കുന്ന ചില മാന്യന്മാരെ കണ്ടിട്ടില്ലേ. അത്തരം പുരുഷന്മാരെ “a rooster in a henhouse” എന്നാണ് നേരിട്ട് അഭിസംബോധന ചെയ്യേണ്ടത്. അവരെപ്പറ്റി പലരും പല “പുയിപ്പും” പരദൂഷണവും ചെറിയ കഥകളും ഒക്കെ രഹസ്യമായി പറയാറുമുണ്ട് , പ്രധാനമായും പിടക്കോഴികള്‍ പരസ്പരം നടത്തുന്ന അത്തരം പരദൂഷണങ്ങളെ അവയുടെ ശബ്ദത്തിനു സമാനമായി “Cluck and duck” എന്ന് വിളിക്കും. ഈ പ്രയോഗങ്ങള്‍ ഒക്കെ മനപ്പാഠം ആക്കി അഭിമാനത്തോടെ ഗര്‍വ്വോടെ തലയുയര്‍ത്തി അധികാര ഭാവത്തില്‍ അഴകുള്ള ഒരു പൂവന്‍കോഴിയെപ്പോലെ  നടന്നു പോകുന്ന നിങ്ങളെ നോക്കി നാളെ ആളുകള്‍ പറയും “what a cock of the walk.!”

 

മീന്‍തല: മലയാളത്തിലെ “കോഴിപ്രയോഗങ്ങള്‍” നിങ്ങള്‍ പങ്കുവെക്കുമല്ലോ...ഞാന്‍ ഒന്ന് പറയാം: “കോഴിക്കാമം”

 

Reference

Smith, Andrew F. "The Chicken Book: Being an Inquiry into the Origin of Domestic Fowls." University of Georgia Press, 2000.

Lawler, Andrew. "Why Did the Chicken Cross the World? The Epic Saga of the Bird That Powers Civilization." Atria Books, 2014.